A difusión do coñecemento é fundamental para que a ciencia avance. Por iso, é esencial compartir os resultados das investigacións con outras persoas investigadoras.

Deste xeito, precísase que os novos coñecementos circulen entre o persoal investigador para poderen debater sobre eles, cuestionalos se fose o caso, e, unha vez que son aceptados pola comunidade investigadora, apoiarse neles
para seguir avanzando na xeración de novo coñecemento.

E para aprender sobre a transmisión e a difusión do coñecemento científico, que mellor forma de facelo que difundindo os resultados dos ensaios nun congreso científico?

Así que a última das actividades de Biomisión consistiu na celebración dun Congreso Científico no Pazo da Cultura de Pontevedra en Outubro de 2025. 

Neste Congreso, as persoas das entidades colaboradoras asumiron o rol de científicas e expuseron os seus traballos ao longo do curso tanto en pósteres científicos como en presentacións científicas.

O Congreso foi presentado pola marabillosa narradora Vero Rilo que axudou a que este primeiro Congreso Biomisión fose todo un éxito.